Lajmet e fundit
Vetëm Massimiliano Allegri dhe Pep Guardiola e kanë eliminuar Carlo Ancelottin nga gjysmëfinalet e Champions League në dhjetë vitet e fundit, ndërsa Sir Alex Ferguson dhe Frank Rijkaard e kanë bërë më parë.
Carlo Ancelotti u kualifikua në finalen e tij të gjashtë të Ligës së Kampionëve të mërkurën pasi mposhti Bayern Munich 2-1 në një gjysmëfinale epike në “Santiago Bernabeu”.
Trajneri italian ka qenë në dhjetë gjysmëfinale në karrierën e tij si trajner dhe është mposhtur vetëm katër herë.
Humbjet e tij më të fundit në këtë fazë të kompeticionit erdhën sezonin e kaluar, kur skuadra e tij Real Madrid humbi ndaj Manchester Cityt të Pep Guardiolës dhe në 2014-15, kur Juventusi i Massimiliano Allegrit kaloi në finale pas një fitoreje të përgjithshme 3-2.
Në dhjetë vitet e fundit, Ancelotti ka fituar dy herë Ligën e Kampionëve, të dyja në Madrid. Së pari në 2013-14 dhe më pas në 2021-22.
Eliminimet e mëparshme të Ancelottit nga gjysmëfinalet e Ligës së Kampionëve datojnë në 2005-06, kur Milani i tij u mund nga Barcelona e Rijkaard dhe në 1998-99 kur italiani ishte në krye të Juventusit dhe humbi ndaj Manchester United të Sir Alex Ferguson.
Ancelotti ka fituar Ligën e Kampionëve katër herë, më shumë se çdo trajner tjetër, duke humbur vetëm një finale në 2004-05, nga Liverpooli.
