Lajmet e fundit
Besfort Zeneli, 21-vjeç, vëllai i Arbër Zenelit, luan për U21-shat e Kosovës.
Mirëpo, ai e ka ndarë mendjen: nëse Suedia do ta thërrasë, ai do ta zgjedhë atë e jo Kosovën.
“Gjithmonë do ta zgjedhja Suedinë”, ka thënë ai, sipas medias suedeze “aftonbladet.se”.
Lojtari i talentuar, që luan për ekipin suedez Elfsborg dhe ka bërë gjashtë paraqitje për U21-shat e Kosovës, asnjëherë nuk është kontaktuar nga Federata Suedeze e Futbollit.
“Është pak e vështirë edhe për federatën suedeze. Kam lulëzuar nën udhëheqjen e (trajnerit të Elfsborg, shën.red.) Oscar Hiljemark. Pata një periudhë të vështirë kur isha më i ri dhe nuk më shkoi aq mirë. Nuk isha i përshtatshëm për asnjërin ekip kombëtar atëherë, por kam qenë i durueshëm dhe kam luftuar”, tha Besfort Zeneli për “Sportbladet”, transmeton Klankosova.tv.
Por, çka nëse do ta ftonte Federata Suedeze e Futbollit që të luante për Suedinë?
“Suedia do të jetë gjithmonë e afërt për mua. Natyrisht, nëse do të kisha shans dhe do të më ftonin, gjithmonë do ta zgjidhja Suedinë”, deklaroi ai.
“Nëse federata më kontakton, do të doja shumë të luaja për Suedinë. Tani e kam Kosovën dhe vërtet ndjej për ta. Nëse s’ka asgjë me Suedinë, mund të vazhdoj të luaj për Kosovën. Edhe aty ndihem mirë”, thotë Besfort Zeneli.
Por, i pyetur se çfarë thonë nëna, babai dhe vëllai, Besforti u shpreh: “Ata më përkrahin për atë se çfarë unë mendoj se është e duhura për mua. Se duhet të zgjedh çfarë më thotë zemra”.
Besfort Zeneli luan si mesfushor, dhe po tregohet mjaft i suksesshëm për Elfsborgun.
Aftonbladet.se shkruan se kur vëllai i tij i madh, Arbri, vendosi të përfaqësonte kombëtaren e Kosovës, kjo gjë bëri bujë të madhe tetë vjet më parë, pasi ai kishte qenë lojtar kyç për U21-shat e Suedisë. /Klankosova.tv
