Lajmet e fundit
Trajneri Sven – Goran Eriksson ka vdekur në moshën 76-vjeçare.
Erikssoni u nda nga jeta pas luftës me kancerin, më pak se një vit pasi kishte njoftuar se po vuante nga kanceri terminal.
Lajmin për vdekjen e tij e ka konfirmuar Bo Gustavsson, ish-agjenti i tij te Lazio.
Suedezi që njohu suksese me Benfikën dhe Lazion (tre herë kampion portugez dhe një herë italian) ishte njashtu trajneri i parë i huaj i kombëtares angleze.
Ditë më parë Erikssoni dha mesazhin e tij lamtumirës për fansat, teksa muajt e fundit ai i plotësoi disa dëshira të tij të fundit, ku njëra prej tyre ishte edhe ajo e të qenit trajner i Liverpoolit (për një ditë).
“E kam pasur një jetë të mirë. Mendoj që të gjithë frikësohemi nga dita kur do të vdesim, por jeta ka të bëjë edhe me vdekjen”, kishte thënë Erikssoni.
“Ju mësoni ta pranoni atë për çfarë është. Me shpresën që në fund njerëzit do të thonë, po, ai ka qenë njeri I mirë, por jo çdokush do ta thotë këtë”.
“Shpresoj që të më kujtoni si njeri pozitiv që po provon të bëjë çfarëdo që mundet. Mos t’ju vijë keq, buzëqeshni. Faleminderit për gjithçka, trajnerëve, lojtarëve, turmave, ka qenë fantastike. Kujdesuni për veten dhe për jetën tuaj. Dhe jetojeni. Lamtumirë”.
