Vdes shqiptari që zbuloi Viagrën (VIDEO)

Si anëtar nderi i Bordit të Universitetit Amerikan në Kosovë, qe ftuar nëpër festa diplomimesh. Por, Ferid Murad thirrej edhe për të mbajtur ligjërata, raporton Klan Kosova. E në një të tillë, më 2011, shkencëtari me prejardhje shqiptare që fitoi çmimin Nobel më 1998 për fiziologji, e i cili vdiq të martën e 4 shtatorit, tregonte se si njëri nga shpikësit e viagrës, të mirat materiale nga ky zbulim nuk i gëzoi goxha vjet. Viagra realisht nuk ishte gjetja për të cilën 87-vjeçari dhe dy shkencëtarët tjerë, Robert Furchgot dhe Louis Ignaro, morën çmimin më të lartë në shkencë. Muradi pati zbuluar se oksidi nitrik është molekulë sinjalizuese në sistemin kardiovaskular, funksionin e të cilës e shpjegonte para studentëve atëbotë. Këtu mjeku, tani i ndjerë, përshkruante edhe tiparet e Alfred Nobelit, që siç e vlerësonte, i ngjante me shqiptarët. Pak ditë para kësaj ngjarjeje, Murad qe shpallur edhe Qytetar Nderi i Kosovës, nga presidentja e atëhershme Atifete Jahjaga, me motivin për kontributin e tij fundamental në fushën e mjekësisë dhe për nderin që i bën vepra e tij popullit të Kosovës. https://www.youtube.com/watch?v=03sgMj-fwPs