Korriku në Hagë: Rasti 2 i Thaçit kryhet me a pa dëshmitarin 8 (VIDEO)

Midis 10 dhe 13 korrikut, Christopher Gosnell e ka planifikuar fillimin e dëgjimit të fjalëve përfundimtare të Prokurorisë dhe Mbrojtjes së Thaçit, Bashkim Smakajt, Isni Kilaj, Fadil Fazliut dhe Hajredin Kuçit për tentim-pengimin e drejtësisë. Kjo ndodh tri javë pas dorëzimit të dosjeve përfundimtare për të cilat gjyqtari i vetëm e ka caktuar si datë 19 qershorin, raporton Klan Kosova. Afatet e vendosura në këtë rast aktualisht janë punë në ajër, meqë si ZPS ashtu edhe avokatët, i kanë sytë kah Dhoma e Apelit. Aty pritet të vuloset vendimi për rrëzimin e dëshmitarit kryesor të Prokurorisë, ekspertit Koen Herlaar, apo të pranohet ekspertiza e tij se dokumentet e gjetura në shtëpinë e Isni Kilajt dhe veturën e Bashkim Smakajt ishin printuar nga printeri i Hashim Thaçit në Sheveningen. Pa këtë vendim, mbrojtja thotë se nuk e argumenton në plotni rastin dhe mund t’i mungojnë arsyetime kundër kësaj ekspertize në rast se rikthehet në prova. Gosnell megjithatë e relativizon vendimin e tij për t’ia rrëzuar dëshmitarin Herlaar Prokurorisë. Aktualisht mbrojtja po pret 14 majin për korrigjimet gjuhësore të përgjimeve dhe dëgjimin e dëshmitares eksperte e linguistikës e thirrur nga Hashim Thaçi. Gjyqtari kanadez ua ka caktuar edhe limitin e fjalëve palëve për dosjet që prezantohen në korrik. 95 mijë fjalë për Prokurorinë dhe Thaçin, dhe nga 30 mijë fjalë për katër të bashkë-akuzuarit e tij. Është rrëzuar kërkesa e avokatëve për shpalljen e aktgjykimit e pastaj, nëse vendimi është për burgim, të caktohet kohëzgjatja. Gjyqtari do të vendosë në të njëjtën ditë edhe për natyrën e vendimit e nëse është nevoja, edhe për dënimet. Kronika më poshtë sjell detaje: https://www.youtube.com/watch?v=Y68rNFXnvX8&t=1s