Valdrin Haliti nga Ferizaj për herë të dytë në listën zyrtare të Apple

I riu nga Ferizaj, Valdrin Haliti, është rikonfirmuar në listën zyrtare të gjigandit teknologjik Apple, për kontributin e tij në raportimin e problemeve të sigurisë në serverët e kompanisë amerikane. Pas një periudhe të gjatë verifikimesh teknike dhe identifikimit të detajuar të çështjeve të raportuara, Apple ka njohur dhe vlerësuar punën e tij, duke e përfshirë emrin e Halitit për herë të dytë në faqen zyrtare të saj. “Siguria kibernetike është pasion imi dhe vlerësimi zyrtar i gjigandit teknologjik Apple, për herë të dytë tani, është motiv i madh për mua t’i vazhdoj hulumtimet e mëtejshme me përkushtim”, është shprehur Haliti. Ai ka theksuar se ky sukses nuk është vetëm i tiji personal, por është arritje që i takon të gjithë vendit, pasi si shtetas i Republikës së Kosovës është ranguar në mesin e pak ekspertëve të shquar të teknologjisë në mbarë botën. Haliti, i cili prej kohësh merret me hulumtime në fushën e sigurisë kibernetike, konsiderohet si një ndër të rinjtë më premtues në këtë fushë dhe shembull frymëzimi për gjeneratat e reja që aspirojnë karrierë në teknologji.