Lajmet e fundit
Anëtarja serbe e Presidencës së BeH-së, Zhelka Cvijanoviq, ka thirrur të martën seancë të jashtëzakonshme me një pikë të vetme në rend të ditës: qëndrimi i Presidencës boshnjake lidhur me aplikimin e Kosovës për anëtarësim në Këshillin e Evropës.
Ndërkaq, siç raporton Radiotelevizoni i Republika Sërpskas (RTRS), Presidenca e BeH-së nuk ka arritur konsensus në lidhje me qëndrimin për aplikimin e Kosovës për anëtarësim në Këshillin e Evropës.
Siç ka mësuar ky televizion, Zhelka Cvijanoviq ka votuar kundër, Denis Beqiroviq për, ndërsa Zhelko Komshiq ka abstenuar.
Se nuk është arritur konsensus e ka konfirmuar edhe Kryetari i Presidencës së Bosnjës dhe Hercegovinës, Denis Beqiroviq në një deklaratë për agjencinë e lajmeve FENA.
“Një anëtar i Presidencës së BeH votoi pro, një kundër dhe një abstenoi. Dhe në fund të seancës konstatova se nuk janë plotësuar kushtet për të vendosur për këtë çështje dhe se Kryesia nuk ka marrë fare vendim”, tha Beqiroviq.
Zhelka Cvijanoviq, anëtare e Presidencës së Bosnjë-Hercegovinës, në konferencën e sotme për media në pas takimit, deklaroi se qëndrimi i BeH-së për pranimin e Kosovës në Këshillin e Evropës duhet të jetë negativ.
“BeH nuk e ka njohur Kosovën dhe nuk duhet të mbështesë anëtarësimin e saj në organizatat ndërkombëtare”, tha Cvijanoviq.
Ajo theksoi se kreu i diplomacisë së Bosnje-Hercegovinës, Elmedin Konakoviq duhet të jetë neutral për këtë çështje në Komitetin e Ministrave të Këshillit të Evropës.
Sipas Cvijanoviqit, arsyeja për këtë është se Presidenca e BeH nuk ka arritur konsensus për çështjen e Kosovës në seancën e sotme.
“Duke pasur parasysh votimet e ndryshme në Presidencën e Bosnje-Hercegovinës, ministri nuk mund të përcaktojë vetë pozicionet. Kur kemi një votë shumëngjyrëshe, nuk mund të ketë qëndrim tjetër përveç neutralit”, tha ajo.
