Spanjë: Personi më i vjetër në botë feston 117-vjetorin e lindjes

Personi më i vjetër i gjallë, Maria Branyas Morera, të hënën në Spanjë festoi ditëlindjen e saj të 117-të. Morera, e cila ka lindur më 4 mars 1907 në San Francisko, ka jetuar në Katalonjë të Spanjës që në moshën 8-vjeçare dhe ka banuar në të njëjtën shtëpi të të moshuarve për 23 vjetët e fundit. Morera u emërua personi më i vjetër i gjallë nga Rekordet Botërore Guinness në janar 2023, pas vdekjes së gruas franceze Lucile Randon në moshën 118-vjeçare. “Ajo është shumë mirënjohëse për të gjitha urimet e marra dhe interesin që kanë treguar kaq shumë njerëz për gjendjen e saj shëndetësore”, tha Eva Carrera Boix, drejtoresha e shtëpisë së të moshuarve. “Ajo është e lumtur që mund ta festojë këtë ditë të veçantë nga afër me familjen dhe kolegët e saj dhe u uron të gjithëve një të hënë të lumtur”, tha Boix. Morera mbetet aktive në shtëpinë e saj të të moshuarve dhe mban një prani në rrjetet sociale në platformën  X me ndihmën e vajzës së saj 80-vjeçare. "Mirëmëngjesi, botë. Sot mbush 117 vjeç. Kam arritur deri këtu", ka shkruar ajo të hënën. Morera është aktualisht personi i 12-të më i vjetër i verifikuar në histori dhe do të ngjitej në vendin nr. 5 nëse arrin në ditëlindjen e saj të 118-të.