Shefi i TikTok-ut thotë se ndalimi i platformës do të "merrte miliarda dollarë nga xhepat e krijuesve"

Drejtori i Përgjithshëm i TikTok-ut ka thënë se ndalimi i platformës në ShBA "do të hiqte miliarda dollarë nga xhepat e krijuesve dhe bizneseve të vogla". Shou Zi Chew, i cili një burim tha se po viziton Uashingtonin këtë javë, shtoi se kompania do të ushtrojë të drejtat e saj ligjore për të parandaluar ndalimin pas një projektligji të miratuar në Dhomë. Përfaqësuesit me shumicë dërrmuese votuan të mërkurën për t'i dhënë pronarit kinez të TikTok-ut, ByteDance rreth gjashtë muaj për të zhveshur asetet amerikane të aplikacionit, ose do të përballet me  ndalim. Projektligji kaloi 352-65 në një votim dypartiak, por ai përballet me një rrugë më të pasigurt në Senat, ku disa favorizojnë një qasje të ndryshme për rregullimin e aplikacioneve në pronësi të huaj që paraqesin shqetësime sigurie. Presidenti amerikan, Joe Biden, ka treguar se do ta nënshkruajë projektligjin nëse ai kalon nga të dyja dhomat. Këshilltari i Sigurisë Kombëtare i Shtëpisë së Bardhë, Jake Sullivan, pyeti të martën: "A duam që TikTok-u, si platformë, të jetë në pronësi të një kompanie amerikane apo në pronësi të Kinës? "A duam që të dhënat nga TikTok-u, të dhënat e fëmijëve, të të rriturve - të qëndrojnë këtu në Amerikë apo të shkojnë në Kinë?" Donald Trump ka thënë se do të kundërshtonte ndalimin sepse do të ndihmonte platformën rivale të mediave sociale Facebook. Ai më parë lëshoi, më pas e anuloi një veprim ekzekutiv gjatë presidencës së tij që synonte të ndalonte TikTok-un dhe një aplikacion tjetër të njohur kinez, WeChat. FBI dhe Komisioni Federal i Komunikimeve kanë paralajmëruar se pronari i TikTok-ut, ByteDance, mund të ndajë të dhënat e përdoruesve, të tilla si historia e shfletimit, vendndodhjen dhe identifikuesit biometrikë, me qeverinë autoritare të Kinës. TikTok pretendon se nuk e ka bërë kurrë këtë dhe nuk do ta bënte këtë nëse do t'i kërkohet. Ministria e Jashtme e Kinës ka kritikuar legjislacionin, duke argumentuar se "megjithëse ShBA nuk ka gjetur kurrë ndonjë provë se TikTok-u ka paraqitur ndonjë kërcënim për sigurinë kombëtare të ShBA-së, sërish kurrë nuk ka pushuar së përndjekuri këtë platformë".