Sa më shumë vajza, aq më gjatë jeton babai

Një studim i fundit ka zbuluar se baballarët që kanë vajza priren të jetojnë më gjatë krahasuar me ata që nuk kanë vajza. Ky përfundim hedh dritë mbi ndikimin që mund të ketë lindja e fëmijëve në shëndetin dhe jetëgjatësinë e baballarëve, një fushë që deri më tani është studiuar relativisht pak. Studiuesit nga Universiteti Jagiellonian analizuan të dhënat demografike të mbi 4,310 personave, përfshirë 2,147 nëna dhe 2,163 baballarë. Ata shqyrtuan numrin e përgjithshëm të fëmijëve, duke bërë dallimin mes vajzave dhe djemve, për të parë nëse ekzistonte ndonjë lidhje me jetëgjatësinë e prindërve. Rezultatet treguan se numri i përgjithshëm i fëmijëve apo i djemve nuk kishte ndikim të dukshëm në jetëgjatësinë e baballarëve. Megjithatë, u vërejt një lidhje e rëndësishme mes numrit të vajzave dhe rritjes së jetëgjatësisë së tyre, transmeton Klankosova.tv. Sipas studimit, baballarët me vajza kanë tendencë të jetojnë më gjatë dhe, për më tepër, sa më shumë vajza të kenë, aq më e madhe është kjo prirje. Të dhënat sugjerojnë se për çdo vajzë të lindur, jetëgjatësia e babait mund të rritet mesatarisht me rreth 74 javë./Klankosova.tv