Pse anglishtja njihet si gjuhë ndërkombëtare?

Anglishtja është sot gjuha më e përdorur ndërkombëtarisht, dhe kjo nuk ka ndodhur rastësisht. Rritja e ndikimit të saj ka ardhur si rezultat i një kombinimi faktorësh historikë, politikë, ekonomikë dhe kulturorë. Së pari, Perandoria Britanike luajti rol kyç në përhapjen e anglishtes gjatë shekujve XVIII dhe XIX. Si një nga perandoritë më të mëdha në histori, Britania kolonizoi shumë vende në të gjitha kontinentet, duke përfshirë Indinë, pjesë të Afrikës, Karaibet, Australinë dhe Amerikën e Veriut. Në këto vende, anglishtja u bë gjuhë zyrtare ose administrative, dhe ndikimi i saj vazhdoi edhe pas dekolonizimit. Më pas, në shekullin XX, Shtetet e Bashkuara të Amerikës u shndërruan në superfuqi ekonomike, teknologjike dhe ushtarake më të madhe në botë. Me përhapjen globale të produkteve amerikane, filmave të Hollywood-it, muzikës pop dhe internetit, anglishtja u bë gjuhë kryesore e komunikimit ndërkombëtar. Në ditët e sotme, anglishtja përdoret gjerësisht si gjuhë e diplomacisë, e shkencës, aviacionit, teknologjisë, si dhe në arsimin ndërkombëtar. Ajo mësohet si gjuhë e dytë në shumë vende dhe shpesh shërben si urë lidhëse midis njerëzve të kulturave të ndryshme. Në thelb, anglishtja është bërë gjuhë ndërkombëtare jo sepse është më e lehtë apo më e mirë se gjuhët  tjera, por sepse historia dhe zhvillimet globale e kanë pozicionuar atë si mjetin më praktik për komunikim në nivel botëror.