Lajmet e fundit
Trajneri i kampionëve të Irlandës së Veriut në futboll, Tiernan Lynch, nuk lë hapësirë që futbollistët e FC Larnes të ndjejnë komoditet, para duelit të kthimit me Ballkanin.
Në një intervistë për BBC, ai thotë se pavarësisht që rezultati në "Fadil Vokrri" ishte shumë i mirë, puna ende nuk ka përfunduar dhe duhet përqendrim edhe më i madh në përballjen e dytë, njofton Klankosova.tv.
Kjo edhe për faktin se irlandezo-verioret humbën vitin e kaluar në dy ballafaqime me suharekasit, 3-0 në Prishtinë dhe 4-1 në Belfast.
Kundërshtari i radhës për fituesin e kësaj përballje, do të jetë humbësi i ndeshjes Lincoln Red - Dinamo Minsk, por që kjo tash për tash nuk ka rëndësi për timonjerin e Larnes.
"Nëse nisim të shikojmë që tani përpara, harrojmë atë që kemi përball, andaj kjo s'duhet të ndodh. Përqendrimin maksimal e kemi te Ballkani" thotë Lynch, raporton BBC, transmeton Klankosova.tv.
Edhe mbrojtësi i skuadrës, Tomas Cosgrove, mendon se do të ishte një gabim i madh të mendosh se ata e kanë kryer punën, me fitoren në kryeqytetin e Kosovës.
Për të përditshmen irlandeze, "Belfast Telegraph", Cosgrove u shpreh se pavarësisht që skuadra e tij e ka një avantazh të vogël, duhet shumë mund për të arritur ta eliminojnë Ballkanin.
Megjithatë sa i përket aktit të dytë, vendasit do të jenë të hendikepuar në sulm, pasi njërin prej aseteve të tyre, e kanë shitur në Holandë, tek Ado Den Hag. 10-shi fantazist irlandez, Lee Bonis, ishte pjesë e formacionit të parë, në ndeshjen e zhvilluar në stadiumin "Fadil Vokrri" në Prishtinë.
Dueli ndërmjet Larnes dhe Ballkanin zhvillohet të enjten me fillim në orën 21:00!
