Lajmet e fundit
Një ndeshje sportive pritet të jetë shembull i miqësisë dhe rivalitetit, por në duelin mes KF Deçanit dhe KF Prizrenit, gjërat dolën nga kontrolli në minutat e fundit, duke çuar në një shpërthim të dhunës që tronditi të dy ekipet, por mbi të gjitha gjithë komunitetin sportiv e sportdashës.
Ngjarja, e cila ndodhi në Deçan, shkaktoi reagime të forta nga të dy trajnerët, të cilët në emisionin “Ora 7” në Klan Kosova, shprehën zhgënjimin dhe keqardhjen e tyre për atë që ndodhi.
Zeqë Mala, trajneri i KF Deçanit, ndau zhgënjimin e tij për situatën, duke e quajtur incidentin si diçka që nuk përket me kulturën sportive të qytetit të tij.
"Në një qytet liridashës, me kulturë dhe mikpritje, kjo s’duhet të kishte ndodhur ndaj asnjë klubi", tha ai, duke shtuar se ngjarja ishte e paplanifikuar dhe se ai vetë nuk ishte i pranishëm në momentin kur ndodhi.
Mala theksoi se marrëdhëniet me KF Prizrenin kanë qenë gjithmonë të mira dhe se ky incident nuk përfaqëson vlerat e klubit të tij. Ai gjithashtu bëri të ditur se i ka kërkuar falje personalisht ekipit të Prizrenit sapo është kthyer nga Shqipëria, duke marrë përgjegjësinë dhe për gjestet e disa lojtarëve të tij.
"Kam shkuar personalisht në klubin e Prizrenit për të kërkuar falje", theksoi Mala, duke u shprehur se edhe klubi i tij do të vendosë sanksione ndaj lojtarëve të përfshirë dhe duke nënvizuar se, megjithëse nuk ishte e qëllimshme, sjelljet e tyre nuk përkojnë me kulturën sportive, njofton Klankosova.tv.
Nga ana tjetër, Bekim Agaj, trajneri i KF Prizrenit, pohoi se situata e dhunës ishte e papritur për të gjithë, duke përmendur se ndeshja kishte nisur në mënyrë normale.
"Kemi shkuar në Deçan duke e ditur që kemi miqësi të mirë me këtë klub, por nuk e kemi pritur këtë ngjarje", tha ai.
Incidenti ndodhi pas shënimit të një goli nga KF Prizreni në minutën e 85-të, moment që ndryshoi atmosferën e ndeshjes.
Sipas Agajt, dhuna që shpërtheu nuk ishte në interes të askujt, as për Deçanin dhe as për Prizrenin.
"Le të jetë kjo hera e fundit që ndodh diçka e tillë", shtoi ai, duke theksuar se të dy ekipet janë pajtuar dhe se falja e kërkuar nga Deçani është pranuar nga Prizreni.
Ai gjithashtu përmendi se kjo është një ngjarje që mund t’i ndodhë çdokujt kur tifozët e papërgjegjshëm dëmtojnë klubin e vet, sikurse edhe atë kundërshtar, transmeton Klankosova.tv.
Në përmbyllje të intervistës, dy trajnerët e skuadrave në fjalë, dhanë një shembull të fortë të pajtimit, duke i zgjatur duart njëri-tjetrit në shenjë të faljes dhe respektit të ndërsjellë.
Kjo ngjarje është një kujtesë e asaj që ndodh kur ndjenjat e zjarrta të sportit dalin jashtë kontrollit dhe kalojnë në dhunë. Edhe pse futbolli është një lojë e pasionit, kjo situatë dëshmon se miqësia dhe respekti janë më të rëndësishme se çdo fitore ose humbje në fushë.
Kështu, përtej një episodi të trishtë, dy klubet dhanë një shembull të pajtimit dhe ndërgjegjësimit që duhet të ndjekin të gjithë në botën e sportit.
