Një nga pemët më të rralla të Tokës e kërcënuar nga ndryshimet klimatike dhe dhitë

Në një pllajë të rrahur nga era, lart mbi Detin Arabik, Sena Keybani mban në krahë një fidan që mezi i arrin deri te kyçi i këmbës. Bima e re, e mbrojtur nga një gardh i improvizuar prej druri dhe teli, është një lloj peme me gjak dragoi - një specie që gjendet vetëm në ishullin jemenas të Socotra-s, e cila tani po përpiqet të mbijetojë përballë kërcënimeve në rritje nga ndryshimet klimatike, transmeton Klankosova.tv “Të shohësh pemët që vdesin, është sikur të humbasësh një nga të vegjëlit e tu”, tha Keybani, familja e të cilit drejton një çerdhe të dedikuar për ruajtjen e specieve. Të njohura për kurorat e tyre në formë kërpudhe dhe lëngun e kuq si gjaku që rrjedh nëpër dru, pemët dikur ishin në numër të madh. Por ciklonet gjithnjë e më të ashpra, kullotja nga dhitë pushtuese dhe trazirat e vazhdueshme në Jemen, i cili është një nga vendet më të varfra në botë dhe i përfshirë nga një luftë civile dhjetëvjeçare, i kanë shtyrë speciet dhe ekosistemin unik të shkojnë drejt kolapsit. Por stuhitë nuk janë kërcënimi i vetëm. Ndryshe nga pemët e pishave ose lisit, të cilat rriten 60 deri në 90 centimetra në vit, pemët e gjakut të dragoit rriten me vetëm 2 deri në 3 centimetra në vit. Kur arrijnë pjekurinë, shumë prej tyre tashmë i janë nënshtruar një rreziku të fshehtë: dhive. Një specie pushtuese në Socotra, dhitë që enden lirshëm i përpijnë fidanët para se të kenë mundësi të rriten. /Klankosova.tv