Ndërron jetë njeriu më i moshuar në botë

Ka ndërruar jetë në moshën 116 vjeçare personi më i vjetër në botë, Susannah Mushatt Jones. Ajo ka ndërruar jetë në qendrën strehuese publike në Brooklyn, ku kishte jetuar tash e tre dekada, transmeton Klan Kosova. Jones ka qenë e njohur si “Miss Susie” ka lindur në një fermë të vogël në Alabama më 8 korrik 1899. Ajo kishte 10 vëllezër e motra të tjera dhe si e re ajo ndiqte shkollën speciale për vajzat e reja me ngjyrë dhe kur diplomoi nga shkolla e mesme në vitin 1922, ajo filloi t’i ndihmojë familjarëve për të mbjellurat. Miss Susie, u largua një vit më pas për të punuar si dado dhe më pas udhëtoi për në New York. Ndonëse personat që e njihnin tregojnë që ajo i adhuronte fëmijët, vet Miss Susie, nuk kishte fëmijë dhe ishte e martuar vetëm për disa vjet. Jones, u verbërua nga glaukoma që kur mbushi 100 vjet. Përveç kësaj ajo nuk ishte e sëmurë, vetëm që pinte nga një tabletë për shtypjen e gjakut. Vitin e kaluar Jones kishte thënë se meritat për jetën e saj të gjatë i takojnë dashurisë së familjarëve si dhe zemërgjerësisë së njerëzve. Familjarët e saj kishin thënë gjithashtu se ndoshta arsyeja për jetëgjatësinë e saj është mënyra se si është ushqyer, pra: vezë,miell i bluar si dhe mish derri për çdo mëngjes. Kurse ajo vet ishte shprehur se gjumi i shumtë është sekreti i jetëgjatësisë së saj dhe që ajo asnjëherë në jetën e saj nuk kishte pirë cigare e alkool.