Largohet pas pesë vjetësh skulptura kontroverse "Quasi"

Një skulpturë e veçantë, një dorë e madhe me fytyrë njerëzore, po largohet nga maja e një galerie në Wellington të Zelandës së Re, pas pesë vjetësh që vështronte qytetin. Skulptura "Quasi," e krijuar nga artisti Ronnie van Hout, u porosit fillimisht nga Galeria e Artit në Christchurch në vitin 2016 dhe u vendos mbi City Gallery Wellington më 2019. Skulptura, e gjatë 5 metra dhe bazuar në dorën dhe fytyrën e vetë artistit, ngjalli polemika që nga fillimi, duke u cilësuar si "e frikshme" nga disa banorë në rrjetet sociale. Kryetarja e Wellington Sculpture Trust, Jane Black, tha në një deklaratë se skulptura do të mungojë. "Asnjë tjetër nuk ka mbërritur me kaq dramatizëm në peizazhin tonë. Quasi erdhi në një mëngjes të kaltër me helikopter dhe krijoi jehonë që nga dita e parë, duke reflektuar veçantinë e krijimtarisë së Wellingtonit", tha ajo. Quasi pritet të largohet të shtunën dhe do të transportohet në Australi, megjithëse ende nuk është caktuar një vend i ri për të.