Kryetari Rama s’u bëri zgjidhje, qentë mbyten me helm në Prishtinë

Kronikë nga: Blerinë Doshlaku Mëngjesin e të hënës së 3 qershorit, u gjetën tre qen të shtrirë në lagjen “4 Llullat” në kryeqytet, si pasojë e dyshimit për helmim. Dyshimin e menduar e faktuan Agjencia për Ushqim dhe Veterinari, që dolën në vendngjarje menjëherë. Për “Ju Flet Prishtinën”, zëdhënësi i kësaj agjencie, Lamir Thaçi tha se ekziston një fakt i fortë mbështetës që vërteton dyshimin e ngritur për helmim, kjo se, në produktin që qentë ishin duke konsumuar janë gjetur insekte të ngordhura. Por se me çfarë u helmuan tre qentë endacakë dhe njëri nga ta me pronar, nga kjo agjenci thanë se do të bëhet e ditur pas hetimeve të bëra nga organet e rendit. Vrasjen e qenve e dënoi edhe Komuna, që gjithashtu deklaruan se bashkëndjejnë me qytetarët për problemin me qentë endacakë dhe sulmet që ua kanë bërë këta të fundit. Për qentë e helmuar, reagim jo fortë të butë pati nga Fondacioni për të Drejtat e Kafshëve, që e vlerësuan si vepër mizore se siç thonë, është bërë dukuri e shpeshtë në krejt vendin. Sipas tyre, mosdënimi i këtyre rasteve inkurajon për veprime edhe më mizore në të ardhmen. Ani se me qëllim të mirë, iniciativën për adoptimin e qenve në rrugë, ky fondacion po e sheh si të gabuar, pasi motivi financiar siç e quajnë ata, nuk tërheq njerëz që kanë prioritet mirëqenien e kafshëve. Krahas kësaj, nga komuna po deklarojnë se kjo pjesë po ecën mjaft mirë në gjithë kryeqytetin e përtej. /Klankosova.tv https://www.youtube.com/watch?v=fQ4o5UaK6YU