Kjo është gruaja që vdiq në Spitalin e Gjakovës, detaje nga rasti që po hetohet (VIDEO)

Gruaja me të cilën bashkëjetoi për më shumë se një dekadë vdiq mëngjesin e së premtes. Për këtë, Genc Abilika po akuzon Spitalin Rajonal të Gjakovës. Siç thotë ky, Myzafere Rizavanollit nuk iu dha ndihma e duhur mjekësore në këtë institucion shëndetësor, ku po trajtohej që nga viti 2022. 64-vjeçarja, në gjendje kome, ka qëndruar e shtrirë për tri vjet në kujdes intensiv dhe nuk ka mundur të komunikojë. Abilika, i cili flet mirë për infermierët, por jo edhe për mjekët dhe drejtorinë, thotë se dhjetë ditët e fundit iu pamundësua të qëndronte pranë partneres së tij për 14 vite. Këto pretendime i hedh poshtë Spitali i Gjakovës duke i cilësuar si të pavërteta dhe të motivuara për njollosje të stafit mjekësor. Në komunikatën e këtij institucioni shëndetësor thuhet se për tri vite me radhë pacientja është trajtuar nga mjekët dhe infermierët e kujdesit intensiv, në përputhje të plotë me protokollet mjekësore të aplikueshme për raste të tilla. Abilika të njëjtat akuza i ka bërë edhe në Policinë e Gjakovës, ku është hapur rast për trajtim të papërgjegjshëm mjekësor. Ndërkohë, edhe Drejtoria e Spitalit të Gjakovës ka kërkuar nga policia dhe prokuroria ta çojnë këtë rast deri në fund për të mos lejuar baltosjen e këtij institucioni. Ndërkohë, trupi i pajetë është dërguar për obduksion në Institutin e Mjekësisë Ligjore. /Klankosova.tv https://www.youtube.com/watch?v=1Yfy3q2yrkA