Katër astronautë kthehen shëndoshë e mirë në Tokë me kapsulën SpaceX

Katër anëtarë të ekuipazhit ateruan në brigjet e Gjirit të Floridës të shtunën, duke u kthyer shëndoshë e mirë nga një mision shkencor pesëmujor në Stacionin Ndërkombëtar të Hapësirës, me kapsulën e SpaceX Crew Dragon. Kapsula SpaceX, e quajtur Endurance, u hodh me parashutë në brigjet e Tampas pak pas orës 21:00. Brenda saj ndodheshin dy astronautë të NASA-s, një astronaut japonez dhe një kozmonaute ruse pas një fluturimi afërsisht nëntë orësh nga laboratori i kërkimit orbital. Ekipi Crew-5 u nis nga Florida më 6 tetor për të kryer rutinë shkencor në bordin e stacionit. Ai përfshinte kozmonauten Anna Kikina, 38 vjeç, e cila u bë rusja e parë që fluturoi në një anije kozmike amerikane në 20 vjet, dhe komandantja e fluturimit të NASA-s, Nicole Aunapu Mann, 45 vjeç, gruaja e parë vendase amerikane e dërguar në orbitë. Piloti i NASA-s, Josh Cassada, 49 vjeç dhe astronauti japonez Koichi Wakata, 59 vjeç, një veteran i katër fluturimeve të mëparshme në hapësirë, ishin gjithashtu në bord. Dy grupe parashutash u vendosën për të frenuar zbritjen e kapsulës në 24 kilometra në orë pak para rënies. Ky mision ishte fluturimi i gjashtë me ekuipazh i SpaceX për NASA-n qëkur anija e saj kozmike Crew Dragon fluturoi për herë të parë me njerëz në maj 2020, kur rivendosi nisjet e ekuipazhit nga toka amerikane pas gati një dekade të varësisë së ShBA-së nga programi rus Soyuz për fluturimet hapësinore. Rrini të informuar mbi zhvillimet kryesore duke u bërë pjesë e komunitetit tonë në Viber. BONUS: Merreni aplikacionin tonë në Android dhe iOS.