Kandidatët e VV-së: Me dënime e akuza për vepra penale (VIDEO)

Në listën e Vetëvendosjes ka 14 njerëz të dënuar e të akuzuar për vepra penale. Emrat e tyre u publikuan të enjten në raportin “Integriteti i kandidatëve, sundimi i ligjit dhe qeverisja e mirë”, që u hartua nga Instituti i Kosovës për Drejtësi, Lëvizja FOL dhe Iniciativa për Progres, raporton Klan Kosova. Vetë bartësi i listës, Albin Kurti, ishte i dënuar me 1 vjet e gjysmë burg me kusht, gjë që i kishte pamundësuar edhe të garojë në zgjedhjet e fundit nacionale. Edhe Albulena Haxhiu, që drejtoi Ministrinë e Drejtësisë, ishte e dënuar me kusht në vitin 2018 për përdorim të armës apo mjetit të rrezikshëm dhe pengim i personit zyrtar. Për të njëjtën arsye ishte akuzuar edhe Glauk Konjufca, numri dy në listën e Vetëvendosjes. Me akuza të njëjta përballen edhe 11 kandidatët e tjerë për deputet nga partia e Albin Kurtit. Për dallim prej tyre, në listën e Partisë Demokratike të Kosovës nuk ka asnjë kandidat për deputet që ka probleme me ligjin. Në Lidhjen Demokratike të Kosovës është vetëm një kandidate me aktakuzë të ngritur. Drita Millaku ngarkohet me akuzën për përdorim të armës apo mjetit të rrezikshëm gjatë kohës sa ishte në Grupin Parlamentar të Vetëvendosjes. Për të njëjtën vepër akuzohen edhe katër kandidatë për deputet nga koalicioni AAK-NISMA nga tetë sa janë gjithsejt në raportin e publikuar të enjten. /Klankosova.tv https://www.youtube.com/watch?v=En_faZ1g-MU