Rekordet Botërore Guinness njoftuan se një murgeshë franceze u bë zyrtarisht personi më i vjetër në botë që është gjallë në moshën 118 vjeç e 73 ditë.
Guinness tha se motra Andre, një murgeshë e lindur si Lucile Randon më 11 shkurt 1904, u emërua zyrtarisht personi më i vjetër i gjallë pas vdekjes së gruas japoneze Kane Tanaka në moshën 119 vjeç e 107 ditë.
Motrës Andre, e cila e mori emrin e saj pasi u bë murgeshë katolike në vitin 1944, iu dha gjithashtu titulli i murgeshës më të vjetër në botë nga Guinness. Ajo është francezja e dytë më e vjetër ndonjëherë dhe e treta evropiane më e vjetër në histori.
Murgesha, e cila është pjesërisht e shurdhër dhe përdor një karrige me rrota, tha se ende përpiqet ta mbajë mendjen aktive.
“Më zgjojnë në orën 7 të mëngjesit, më japin mëngjesin, më pas më vendosin në tavolinën time ku qëndroj e zënë me gjëra të vogla”, tha motra Andre për Guinness World Records, transmeton Klan Kosova.
Stafi në shtëpinë e të moshuarve të motrës Andre tha se asaj i jepet ende nga një gotë verë çdo ditë.
Personi më i vjetër ndonjëherë, francezja Jeanne Louise Calment, lindi më 1875 dhe vdiq në moshën 122 vjeç e 164 ditë.
https://www.youtube.com/watch?v=hd-sLopOse8
●●●
EVSHKRIMI NGA
E V
Editorial nga Klan Kosova — ndjek kuriozitete dhe zhvillimet e tjera kryesore të vendit.
