Hovenieri për çlicencimin e MTS-it: Qeveria të ketë shumë kujdes (VIDEO)

Një vendim i fillim gushtit të këtij viti, mund të ketë shkelur një marrëveshje të para 8 vjetëve mes Kosovës e Serbisë. Kjo kur qeveria vendosi t’ia heqë licencën operatorit serb MTS për të transmetuar në Kosovë, siç u tha për shkak të përmbajtjes antikushtetuese në dokumentacion, raporton Klan Kosova. Ky vendim u vlerësua të jetë paksa i ngutshëm, meqë për të ekzekutivi nuk u koordinua me askënd. Se duhej të kishte kujdes të shtuar në këtë rast e tha ambasadori amerikan, Jeffrey Hovenier. “Kjo është një çështje shumë sensitive. Dhe në rastin e çdo biznesi licenca e te cilit mund të tërhiqet ne do të sugjeronim secilën qeveri që ti bëjë këto veprime me kujdes. Është gjë e madhe kur ia suspendon licencën një biznesi. E patëm këtë diskutim, në një kontekst tjetër me Klan Kosovën, po ashtu. Por, MTS është veçanërisht special, pasi një pjesë e mirë e bazave të operimit të tij është një marrëveshje e arritur nën marrëveshjen e dialogun lidhur me provizionet e shërbimeve telefonike fikse dhe mobile. Pra, e inkurajojmë qeverinë në mënyrë të veçantë që të jetë shumë, shumë e kujdesshme për vendimet që merr", ka thënë Hovenier. Amerikani bëri të ditur se përfaqësuesi i posaçëm i Bashkimit Evropian, Miroslav Lajçak, po dialogon me qeverinë se si të veprohet tutje. “Lajçak dhe ekipi i tij po punojnë me Qeverinë e Kosovës se si të menaxhohet kjo. Nuk dua të supozoj asgjë por ne e mbështesim punën e të dërguarit të BE-së, që ka përgjegjësi për të siguruar se gjithçka bëhet në pajtim me marrëveshjet e Brukselit”, u shpreh ai. MTS është kompani e themeluar në bazë të Marrëveshjes së Brukselit për telekomunikacionin e Kosovës dhe Serbisë nga viti 2015, si pjesë e dialogut për normalizimin e marrëdhënieve. Në fund të vitit 2016, kjo kompani me seli në Mitrovicën e Veriut, mori licencën për të operuar në Kosovë. Ndërkohë, nga ky institucion ditë më parë thanë se do ta apelojnë këtë vendim duke mbrojtur siç thanë, interesat e të gjithë qytetarëve që përdorin shërbimet e tyre. https://www.youtube.com/watch?v=HYuIhN0ZHXk