Çifti uellsian fiton për herë të dytë në lotari, shanset ishin 1 në 24 trilionë

Historia e tyre është 24 trilionë me një – një çift uellsian që sfidoi shanset astronomike për t'u bërë fitues i miliona dollarëve jo vetëm një herë, por dy herë. Richard Davies, 49 vjeç, dhe gruaja e tij, Faye Stevenson-Davies, 43 vjeçe, morën shumën e dytë që i ndryshoi jetën nga Lotaria Kombëtare e Mbretërisë së Bashkuar të martën, pasi dëgjuan një instinkt të brendshëm që u thoshte të injoronin shanset dhe të provonin, raporton CNN, transmeton Klankosova.tv. “Ne e dinim se shanset që kjo të ndodhte përsëri ishin të jashtëzakonshme”, tha Stevenson-Davies në një deklaratë të lëshuar nga Lotaria Kombëtare. “Por ne jemi provë se nëse besoni, çdo gjë është e mundur”. Çifti me fat kapi për herë të parë xhekpotin në qershor 2018 kur numrat e tyre, të tërhequr në një lojë të “EuroMillions Millionaire Maker”, u dhanë atyre një shumë të majme prej 1 milion funtesh. Edhe pas fitores së tyre, dyshja vazhdoi të blinte bileta lotarie, duke ushqyer shpresën se një tjetër fat i madh mund të ishte në lojë. Ata kishin të drejtë që ndoqën parandjenjën e tyre, por suksesi i tyre i dytë ishte pak më i vështirë. Këtë herë, u deshën katër shorte radhazi për t'u siguruar atyre paratë e mëdha. Në mrekullinë e tyre të Krishtlindjeve, dyshja fitoi edhe 1 milion funte të tjera, duke habitur ekspertët që vlerësojnë se shanset për një fitore të dyfishtë janë një në 24 trilionë. Pavarësisht fitoreve të tyre, dyshja nuk e ka humbur oreksin për punë. Davies tha se do të vazhdojë të punojë shtatë ditë në javë si korrier gjatë Krishtlindjeve, i vendosur për të dorëzuar shumë pako të porositura gjatë sezonit festiv. Ndërkohë, Stevenson-Davies tha se do të vazhdojë t'u ofrojë mbështetje për shëndetin mendor klientëve të saj, përfshirë edhe në ditën e Krishtlindjeve. Por çifti ende nuk ka vendosur se si do t'i shpenzojnë paratë e çmimit. “Herën e parë që u dhuruam njerëzve makina, dhuruam një minibus ekipit lokal të regbit dhe bëmë çmos për të ndihmuar miqtë dhe familjen... Ishte e mahnitshme, të ishim në gjendje të bënim një ndryshim”, tha Davies. Ai shtoi: “Këtë herë, kush e di? Do të marrim kohën tonë dhe do ta shijojmë momentin”. /Klankosova.tv