Alpinisti i humbur në malet e Australisë mbijetoi për dy javë me musli dhe ujë malor

Një alpinist që humbi për pothuajse dy javë në New South Wales të Australisë është gjetur gjallë, duke mbijetuar duke ngrënë fruta të mbledhura dhe dy biskota musli. Studenti i mjekësisë Hadi Nazari humbi kontaktet me grupin e tij më 26 dhjetor gjatë një ecje në Parkun Kombëtar Kosciuszko në rajonin e Maleve Snowy, pasi ishte larguar për të bërë fotografi, transmeton klankosova.tv. Qindra persona, përfshirë miqtë dhe familjen e tij, iu bashkuan përpjekjeve për ta gjetur 23-vjeçarin. Ai u gjet nga alpinistë të tjerë rreth orës 15:15 (04:15 GMT) të mërkurën. Nazari u bëri thirrje alpinistëve dhe u tha atyre se ishte humbur dhe kishte etje, tha inspektori Andrew Spliet për gazetarët. Pasi alpinistët kontakatuan shërbimet e urgjencës, zoti Nazari u ngrit nga helikopteri dhe u dërgua në një pikë të komandës së kërkimit. Ai u vlerësua nga mjekët dhe më pas u transportua në spital. Spliet tha se Hadi Nazari ishte në gjendje të mirë shëndetësore – i vigjilent, i aftë për të folur dhe pa dëmtime të rëndësishme. Dy biskotat musli që Nazari kishte gjetur në një strehë në male ishin "gati e vetmja ushqim që kishte konsumuar gjatë këtyre dy javëve", shtoi ai, duke theksuar se alpinisti kishte gjetur gjithashtu ujë nëpër përrenj dhe kishte mbledhur fruta. Familja e Nazarit, sipas bbc, që u pa duke e përqafuar atë në kampin e kërkimit, konfirmoi më vonë për mediat lokale se ai ishte mirë. "Kjo është dita më e lumtur e jetës sonë," thanë ata për 9News. Nazari u gjet afër Liqenit Blu, rreth 10 km larg kampit ku ai kishte planifikuar të takonte miqtë e tij më 26 dhjetor. "Ai ka kaluar shumë distancë gjatë kësaj periudhe," tha Spliet, duke shtuar se policia do ta "takonte" atë pasi të kontrollohej nga spitali.