30 persona i djegin këmbët në seminarin e motivuesit Tony Robbins (VIDEO)

Më shumë se 30 persona të cilët ishin pjesëmarrës në seminarin e autorit të librave motivues, Tony Robbins, kanë kërkuar ndihmë mjekësore pasi ai i inkurajoi që të ecnin nëpër thëngjill të nxehtë si mënyrë e tejkalimit të frikës. Pesë pjesëmarrës u dërguan në spital të enjten mbrëma, ndërsa të tjerët u trajtuan në vendin e ngjarjes për djegie të shputave dhe këmbëve, njofton Klan Kosova. Thëngjilli i zjarrtë u shpërnda jashtë Kay Bailey Hutchison Convention Center, në Dallas, si pjesë e seminarit katërditor të Robbins me titull: “Unleash the Power Within” (“Zgjoni fuqinë e brendshme”). Sipas përfaqësuesve të Robbins, rreth 7.000 njerëz ecën mbi thëngjill të zjarrtë kurse vetëm pesë “kërkuan ndihmë më serioze sesa ajo që ishte në dispozicion aty për aty”. Ecjet e tilla janë të shpeshta në seminaret e tij. Më shumë se 20 persona kishin nevojë për ndihmë shkaku i djegieve të shputave në një seminar të ngjashëm në vitin 2012, në San Jose, Kaliforni. Librat e Robbins janë shitur në miliona ekzemplarë, përfshirë edhe në gjuhën shqipe.   https://www.youtube.com/watch?v=GYkYQ0EI2z0