“Zëri i Shehrijes”, rrëfimi i gruas që dëshmoi kundër dhunuesve, por vdiq pa e gëzuar drejtësinë (VIDEO)

Dhimbja e luftës nuk përfundoi kurrë për shumë të mbijetuar në Kosovë. Ndër ta ishte edhe Shehrije Balaj nga Bllagaja e Pejës, e mbijetuara e parë e dhunës seksuale gjatë luftës që guxoi të dëshmojë publikisht dhe të përballet me dhunuesit e saj në një sallë gjykimi në Beograd. Ajo rrëfeu para gjykatës tmerrin që përjetoi në vitin 1999, duke ndihmuar në dënimin e kriminelëve serbë. Por, emri dhe historia e saj u bënë të njohura vetëm pas vdekjes. Shehrije Balaj vdiq në vitin 2018, në kushte të rënda ekonomike dhe shëndetësore, pa e gëzuar asnjëherë statusin e të mbijetuarës së dhunës seksuale gjatë luftës dhe pa marrë mbështetje institucionale. Sot, kujtimi për të jeton tek dy fëmijët që la pas. Djali i saj, Haxhi Balaj, e kujton si një grua të fortë, e cila punoi pa u ndalur për të mbajtur familjen. “Ka qenë si burrë, vetë burrë e vetë grua. Më së shumti ka qenë me neve”, rrëfen ai për emisionin “MAT” në Klan Kosova.