Zemërimi mund të rrisë rreziqe afatgjata për sëmundjet e zemrës

Ndjenja e zemërimit ngushton enët e gjakut në mënyra jo të shëndetshme dhe mund të rrisë gjasat afatgjata të një personi për sëmundje të zemrës, paralajmëron një studim i ri. “Nëse jeni një person që zemëroheni gjatë gjithë kohës, keni lëndime kronike në enët tuaja të gjakut”, tha udhëheqësi i studimit, Dr. Daichi Shimbo, kardiolog në Qendrën Mjekësore të Universitetit Columbia Irving në New York City. Ekipi i tij kreu eksperimente ku monitorohej aktiviteti i enëve të gjakut teksa njerëzit ishin në gjendje të zemëruar kundrejt gjendjeve të ankthit, trishtimit ose emocioneve neutrale. Ata zbuluan se një gjendje shpirtërore e zemëruar ishte e lidhur me një paaftësi të përkohshme të enëve të gjakut për t'u zgjeruar (relaksuar) siç duhet. Këto efekte zgjatën deri në 40 minuta pas përfundimit të shpërthimit të zemërimit. "Ne kemi dyshuar prej kohësh, bazuar në studimet vëzhguese, se zemërimi mund të ndikojë negativisht në zemër. Ky studim te të rriturit e shëndetshëm ndihmon në plotësimin e një boshllëku të vërtetë të njohurive dhe tregon se si mund të ndodhë kjo", tha Laurie Friedman Donze, e cila është psikologe dhe oficere programi në Degën e Aplikimeve Klinike dhe Parandalimit të Institutit Kombëtar të Zemrës, Mushkërive dhe Gjakut (NHLBI), i cili financoi studimin.