Zbulohet tuneli në piramidën e madhe të Gizës që mund të çojë te varri i mbretit Khufu

Arkeologët kanë njoftuar se e kanë zbuluar një tunel 9 metra të gjatë mbi hyrjen e piramidës së madhe të Gizës, i cili mund të çojë te varri i faraonit Khufu të Dinastisë së Katërt, i cili sundoi në mijëvjeçarin e tretë para Krishtit. Zahi Hawass, arkeologu i profilit të lartë i Egjiptit dhe ish-ministër i antikiteteve, e cilësoi tunelin si "zbulimin më të rëndësishëm të shekullit" në një konferencë shtypi të mbajtur më 2 mars, shkruan TAP, transmeton Klan Kosova. Zbulimi do të çojë në "më shumë zbulime të sekreteve", shtoi ai, duke thënë se "ekziston një mundësi e madhe... që tuneli mbron dhomën aktuale të varrimit të mbretit Khufu". Tuneli u zbulua nga ScanPyramids, një konsorcium i nisur në vitin 2015 nga studiues në universitete në Francë, Gjermani, Kanada, Japoni dhe Egjipt. Arkeologët zbuluan tunelin në vitin 2016, duke përdorur teknologji jo-invazive për të parë brenda strukturës 4500-vjeçare. Ekipi i ScanPyramids përdori radiografinë e muonit me rreze kozmike për të gjurmuar nivelin e rrezatimit që kalon nëpër muret e piramidës, një teknikë e cila ndihmoi në zbulimin e dhomave të fshehura duke përfshirë korridorin e hyrjes. Një aparat i vogël i përdorur në procedurat mjekësore u përdor gjithashtu për të fotografuar tunelin. “Ne e kuptuam se ishte aq afër sipërfaqes sa që një endoskopi [një procedurë e përdorur për të parë brenda trupit] ishte e mundur”, tha Sébastien Procureur, një akademik në Universitetin e Paris-Saclay dhe anëtar i ScanPyramids, për Daily Mail. Klikoni KËTU për t’u bërë pjesë e kanalit zyrtar të Klan Kosovës në Viber. Klikoni KËTU për ta shkarkuar aplikacionin e Klan Kosovës në Android, dhe KËTU për iOS.

klankosova.tv