Yjet e "Romeo dhe Zhuljeta" ngrejnë padi për skenën nudo të xhiruar në adoleshencën e tyre

Dy yjet e filmit "Romeo dhe Zhulieta" të vitit 1968 paditën kompaninë Paramount Pictures për një shumë 500 milionë dollarëshe për shkak të një skenë nudo në filmin e xhiruar kur ata ishin adoleshente, shkruan AP, trasnmeton Klan Kosova. Olivia Hussey, atëherë 15 vjeçare - tani 71 vjeç, dhe Leonard Whiting, atëherë 16 vjeçar - tani 72 vjeç, ngritën padi në Gjykatën e Lartë të Qarkut të Los Anxhelosit duke pretenduar abuzim seksual, ngacmim seksual dhe mashtrim. Regjisori, Franco Zeffirelli, i cili vdiq në vitin 2019, fillimisht u tha të dyve se do të vishnin të brendshme me ngjyrë mishi në skenën e dhomës së gjumit e cila shfaqet më vonë në film dhe u xhirua në ditët e fundit të xhirimeve, pretendon padia. Por në mëngjesin e xhirimit, Zeffirelli i tha Whiting-ut, i cili luante rolin e Romeos dhe Hussey-t, e cila luante rolin e Juliet, se ata do të mbanin vetëm grim trupi, ndërkohë që i siguroi që kamera do të pozicionohej në një mënyrë që nuk do të tregonte lakuriqësi. Megjithatë, ata u filmuan nudo pa dijeninë e tyre, në kundërshtim me ligjet e Kalifornisë dhe ato federale kundër sjelljes së pahijshme dhe shfrytëzimit të fëmijëve, thuhet po ashtu në padi. Zeffirelli u tha atyre se duhet të luanin nudo "përndryshe fotografia do të dështonte" dhe karriera e tyre do të dëmtohej. Aktorët "besonin se nuk kishin zgjidhje tjetër veçse të vepronin nudo me grim trupi siç kërkohej", sqaron më tej te padia. Të pasmet e zhveshura të Whiting dhe gjoksi i zhveshur i Hussey shfaqen shkurtimisht gjatë skenës. Filmi dhe kënga e tij tematike, ishin hitet kryesore në atë kohë, dhe që atëherë u është shfaqur brezave të nxënësve të shkollave të mesme që studiojnë shfaqjen e Shekspirit. Deklarata gjyqësore thotë se Hussey dhe Whiting kanë pësuar dëmtime emocionale dhe ankth mendor për dekada, dhe se secili ka pasur karriera që nuk pasqyrojnë suksesin e filmit. Ai thotë se duke pasur parasysh vuajtjet dhe të ardhurat e sjellë nga filmi që nga publikimi i tij, aktorët kanë të drejtë për dëme prej më shumë se 500 milionë dollarë. Padia u ngrit në bazë të një ligji në Kaliforni që pezullon përkohësisht statutin e kufizimeve për abuzimin seksual të fëmijëve, gjë që ka çuar në një mori padish të reja dhe ringjalljen e shumë të tjerave që më parë ishin hedhur poshtë.