Xhaka për ndeshjen ndaj Kosovës: Një finale e mundshme në Prishtinë

Kapiteni i Zvicrës, Granit Xhaka, ka folur rreth përgatitjeve që kombëtarja helvetike po i bën për ndeshjet ndaj Suedisë dhe ndaj Kosovës më 18 nëntor në "Fadil Vokrri". Në një intervistë për gazetën e njohur Blick, ka thënë se nëse do të dështojnë ndaj suedezëve, atëherë në Prishtinë do të jetë një finale. “Nëse bëjmë punën tonë kundër Suedisë, nuk do të vijë deri aty. Dhë nëse përfundojmë në një finale në Prishtinë, atëherë le të jetë ashtu. Ne e pranojmë këtë situatë. Nuk është hera e parë që luajmë atje”, tha Xhaka transmeton Klankosova.tv. Mesfushori i Sunderlandit, po ashtu foli edhe rreth largimeve nga kombëtarja zvicerane të dy futbollistëve, Albian Hajdarit dhe Leon Avdullahut, të cilët iu bashkangjitën "Dardanëve". “Lojtarë me cilësi të tillë, nuk është dashur t’i linim pas dore. A do të kishin arritur të nxini vendin e titullarit te Zvicra brenda tre apo katër vjetëve? Do të vija në dyshim këtë, duke marrë parasysh se kush luan aktualisht për ne. Ardon Jashari , është me ne për tre vjet dhe ka bërë veç katër paraqitje". "A është Leon Avdullahu më i mirë se Ardon Jashari? Nuk mendoj kështu. Por, Leoni është futbollist i mirë, përndryshe nuk do të luante çdo ndeshje për Hoffenheimin. Ndoshta i mungonte durimi. Por, në fund të fundit, është vendimi i tyre për të luajtur me Kosovën, e cila tashmë po luan në nivele shumë të larta”. Kosovë-Zvicër luhet më 18 nëntor në Prishtinë në stadiumin "Fadil Vokrri" me fillim nga ora 20:45. Ndërkaq në ndeshjen e parë, skuadra e Murat Yakin e ka mposhtur thellë Kosovën, me rezultat 4:0.