Vdiq në moshën 84-vjeçare Anne Perry - vrasësja e kthyer në shkrimtare

Anne Perry, e cila ndihmoi në vrasjen e nënës së shoqes së saj si adoleshente, ka vdekur në moshën 84-vjeçare. Shkrimtarja i vuajti pesë vjet burgim nga mosha 15-vjeçare për vrasjen e Honorah Mary Parker, shkruan BBC, transmeton Klan Kosova. Perry vdiq në një spital në Los Anxhelos, konfirmoi agjenti i saj. Ajo kishte disa muaj që ishte shtrirë pasi pësoi një sulm në zemër në dhjetor. Autorja ishte frymëzimi për filmin e Peter Jackson të vitit 1994 Heavenly Creatures, ku luajti Kate Winslet. Në kohën kur Perry vrau nënën e shoqes së saj më të mirë, ajo njihej si Juliet Hulme, por më vonë adoptoi Anne Perry si një emër për karrierën e saj të shkrimit. Vrasja ndodhi në Christchurch, Zelanda e Re, në vitin 1954 dhe u komplotua nga Perry dhe shoqja e saj Pauline Parker, vajza e viktimës. Detajet u zbuluan më vonë në ditarët e gjetur nga policia. Honorah Mary Parker vdiq pasi u godit me një tullë rreth 20 herë. Kur çështja shkoi në gjyq, një gjykatë konstatoi se dy vajzat kishin komplotuar vrasjen në një përpjekje për të shmangur ndarjen kur prindërit e 16-vjeçares Parker po planifikonin ta dërgonin atë jashtë vendit. Duke qenë se të dyja ishin nën moshën 18 vjeç, vajzat ishin shumë të reja për dënimin me vdekje dhe në vend të kësaj u dërguan në burg. Perry lindi në Blackheath, Londër, në tetor 1938 dhe u zhvendos fillimisht në Bahamas në moshën 8-vjeçare përpara se të vendosej në Zelandën e Re. Pasi u lirua nga burgu, Perry u largua nga Zelanda e Re për t'u kthyer në MB dhe punoi për një kohë të shkurtër si stjuardesë. Romani i saj i parë, The Cater Street Hangman, u botua në vitin 1979. Ajo vazhdoi të shkruajë një varg romanesh në seri të shumta, të cilat kolektivisht shitën 25 milionë kopje në mbarë botën. Romani më i fundit në serinë Pitt u botua muajin e kaluar.

klankosova.tv