Vdes medalisti olimpik Audun Groenvold, u godit nga rrufeja

Medalisti olimpik i ski cross, Audun Groenvold, ka vdekur në moshën 49-vjeçare pasi u godit nga rrufeja, njoftoi të mërkurën federata norvegjeze e skive. Groenvold fitoi medaljen e bronztë në Lojërat Olimpike të Vankuverit 2010, shkruan CNN, transmeton Klankosova.tv. "Me trishtim të madh morëm lajmin për vdekjen e parakohshme të Audun Groenvold," tha federata. "Ish-skiatori kombëtar alpin dhe atleti i ski cross u godit së fundmi nga rrufeja gjatë një udhëtimi". Federata tha se Groenvold "u dërgua shpejt në spital dhe mori trajtim për lëndimet që pësoi nga goditja e rrufesë" dhe më pas vdiq të martën në mbrëmje. Groenvold ishte anëtar i ekipit alpin të skive të Norvegjisë përpara se të kalonte në stilin e lirë dhe ski cross. Ai pati një përfundim në podium si skiator alpin i Kupës së Botës, duke përfunduar i treti në një zbritje në Sierra Nevada, Spanjë, në vitin 1999.