Vdes gazetari i sportit Muharrem Bulliqi, FFK ngushëllon familjen

Është ndarë nga jeta gazetari i dikurshëm i sportit, Muharrem Bulliqi, me c'rast kryetari i Federatës së Futbollit të Kosovës, Agim Ademi, ka ngushëlluar familjen e tij. Ai e ka vlerësuar punën e Bulliqit si gazetar në "Rilindja", si dhe për përkrahjen e tij për gjeneratën pasuese të gazetarëve sportivë të pasluftës. "Muharrem Bulliqin do ta kujtojmë përherë për kontributin e tij, veçmas në periudhën e vështirë, të asaj që e njohim si koha e rezistencës në vitet e 90-ta, kur e pasqyroi në mënyrë të guximshme në opinion zhvillimin e sportit të pavarur të Kosovës nën kushtet e okupimit", shkruan Ademi. "Ai ishte i përkushtuar ndaj profesionit të gazetarisë, derisa ishte afërt dhe i respektueshëm me të gjithë ata që e njohën". Letra e plotë nga kryetari i FFK-së, Agim Ademi: E nderuara Familje e Muharrem Bulliqit! Të nderuar gazetarë sportivë dhe anëtarë të SHGSK-së! Me pikëllim e dhembje të thellë e morëm lajmin për ndarjen nga jeta të anëtarit tuaj të familjes dhe doajenit të gazetarisë sportive, Muharrem Bulliqi, andaj me lejoni që në emrin tim, KE të FFK-së dhe tërë komunitetit të futbollit të ju shprehim ngushëllimet tona më të thella dhe më të sinqerta. Muharrem Bulliqi si pjesë e gjeneratës së shquar të gazetarëve në të përditshmen “Rilindja”, me dijen dhe punën e tij profesionale la gjurmë të pashlyeshme në gazetarinë sportive të Kosovës, teksa ishte edhe përkrahës i madh i gjeneratës së re të gazetarëve sportivë pas luftës. Muharrem Bulliqin do ta kujtojmë përherë për kontributin e tij, veçmas në periudhën e vështirë, të asaj që e njohim si koha e rezistencës në vitet e 90-ta, kur e pasqyroi në mënyrë të guximshme në opinion zhvillmin e sportit të pavarur të Kosovës nën kushtet e okupimit. Ai ishte i përkushtuar ndaj profesionit të gazetarisë, derisa ishte afërt dhe i respektueshëm me të gjithë ata që e njohën. Komuniteti i gazetarëve sportiv dhe sporti në përgjithësi humbi një tjetër penë të shquar, i cili u bashkohet në botën e përjetshme shumë doajenëve të gazetarisë sportive, të cilët me përvojën e tyre u shërbyen gjeneratave të reja. I përjetshëm kujtimi për Muharrem Bulliqin! Me respekt Agim Ademi, president i FFK-së