UEFA pezullon përkohësisht Gianluca Prestianni pas përplasjes me Vinicius Jr

Benfica është përballur me një goditje të rëndë para ndeshjes së kthimit në Champions League, pasi Gianluca Prestianni është pezulluar përkohësisht nga UEFA pas akuzave për sjellje diskriminuese ndaj Vinícius Júnior. Sipas raportimeve të mediave ndërkombëtare, lojtari i Benficas është ndëshkuar me një pezullim të përkohshëm dhe do të mungojë në ndeshjen e kthimit kundër Real Madrid, ndërsa hetimi i UEFA-s vazhdon për incidentin e ndodhur në takimin e parë. Akuzat lidhen me pretendimet se Prestianni ka përdorur fjalë me përmbajtje raciste ndaj sulmuesit brazilian gjatë ndeshjes, çka bëri që loja të ndërpritej për disa minuta dhe të aktivizohej protokolli kundër racizmit. Vetë lojtari i ka mohuar akuzat, ndërsa klubi portugez ka njoftuar se do të apelojë vendimin, duke theksuar se pezullimi është i përkohshëm dhe nuk përbën vendim përfundimtar. Nëse shpallet fajtor pas përfundimit të hetimit, Prestianni mund të përballet me një dënim shumë më të rëndë, që sipas rregulloreve disiplinore mund të arrijë deri në 10 ndeshje pezullim. Ky rast ka rritur tensionet mes dy klubeve dhe ka rikthyer në qendër të vëmendjes luftën kundër racizmit në futbollin evropian, ndërsa vendimi final i UEFA-s pritet pas përfundimit të hetimeve.