Udinese në ndjekje të Marash Kumbullës, pritet drita jeshile nga Mallorca

Udinese ka intensifikuar interesimin për Marash Kumbullën dhe po punon për ta sjellë mbrojtësin shqiptar në Serie A. Lajmi raportohet nga Gianluca Di Marzio, i cili bën të ditur se klubi friulan po pret tashmë vetëm miratimin e Mallorcës për të avancuar operacionin. Kumbulla, i lindur në vitin 2000, është aktualisht në huazim te Mallorca nga Roma, por aventura e tij në La Liga mund të përfundojë para kohe. Në këtë situatë, Roma do të ishte e gatshme të lehtësonte një tjetër huazim, këtë herë drejt Italisë, ku Udinese shihet si destinacioni më konkret. Përveç Udineses, situata e mbrojtësit shqiptar po ndiqet edhe nga Espanyoli në Spanjë, por pista italiane duket më e avancuar në këto momente. Klubi bardhezi e vlerëson profilin e Kumbullës për forcimin e repartit defensiv dhe po pret vetëm “lejen” nga Mallorca për të mbyllur marrëveshjen. Ditët në vijim pritet të jenë vendimtare për të ardhmen e Marash Kumbullës, me Udinesen që shpreson ta rikthejë atë në Serie A sa më shpejtë.