Mbrëmë nisi edicioni i nëntë i festivalit tradicional të folklorit “Oda e Llapushës” në Malishevë, nën përkujdesjen e kryetarit të komunës, Ekrem Kastrati.
Nga Komuna e Malishevës theksojnë se ky festival, i cili ka për qëllim ruajtjen dhe kultivimin e trashëgimisë kulturore shqiptare, mblodhi së bashku grupe, ansamble, shoqëri, dhe rapsodë nga të gjitha trojet shqiptare.
Në ceremoninë e hapjes, kryetari Kastrati theksoi rëndësinë e festivalit në promovimin e kulturës dhe traditës vendase. Ai përgëzoi pjesëmarrësit dhe u uroi suksese në këtë festival garues, i cili njëkohësisht nxjerr në pah pasurinë kulturore të Malishevës.
Ngjarja u pasurua edhe me praninë e qytetarëve të nderit të sapo shpallur të Malishevës: David Carr, anëtar i Këshillit të shtetit të New York-ut, Charles D. Fall, anëtar i Asamblesë së shtetit të New York-ut, dhe veprimtari i njohur Naser Nika.
Ata përshëndetën të pranishmit dhe vlerësuan rëndësinë e festivalit si një platformë për promovimin e vlerave kulturore. Gjithashtu, shprehën gatishmërinë për të thelluar bashkëpunimin mes Malishevës dhe shtetit të New York-ut, duke paralajmëruar edhe binjakëzimin me një nga qytetet e këtij shteti.
Gjatë natës së parë të festivalit u prezantuan 14 grupe dhe rapsodë me pikat e tyre artistike. Sonte do të mbahet nata e dytë dhe finale, ku juria profesionale do të vlerësojë performancat sipas rregullave të festivalit.
Çmimet kryesore të festivalit përfshijnë çmimin “Salih e Feriz Krasniqi”, si dhe çmime të tjera, përfshi çmimi për debutantin më të ri, çmimi i diasporës e ai i publikut.
●●●
EVSHKRIMI NGA
E V
Editorial nga Klan Kosova — ndjek kulturë dhe zhvillimet e tjera kryesore të vendit.
