Turqia ndalon nëntë gazetarë gjatë protestave kundër arrestimit të Imamoglut

Autoritetet turke kanë ndaluar nëntë gazetarë që po mbulonin protestat kundër arrestimit të kryetarit të Stambollit, Ekrem Imamoglu, gjë që është bërë e ditur nga Unioni i Gazetarëve të Turqisë, ndërkaq arsyet e ndalimit të gazetarëve nuk janë dhënë ende Arrestimi i Imamoglut ka shkaktuar protesta të mëdha në Turqi, pas një vendimi të gjykatës që e urdhëroi të qëndrojë në burg deri në gjykimin për akuzat për korrupsion. Ky rast ka nxitur disa ditë protestash në të gjithë vendin, shumica e tyre paqësore, raporton Reuters, transmeton Klankosova.tv. Partia opozitare CHP ka thirrur protesta kundër vendimit të gjykatës, duke e cilësuar atë si të politizuar. Ndërkohë, qeveria mohon se hetimet janë të motivuara politikisht dhe thekson se gjykatat janë të pavarura. Imamoglu ka hedhur poshtë akuzat, duke i quajtur ato "shpifje të papërfytyrueshme", dhe ka bërë thirrje për protesta. Lideri i CHP-së, Ozgur ozel, tha se protestat do të vazhdojnë deri në lirimin e Imamoglut.