Trajneri e konfirmon, Xhaka do të jetë kapiten i Sunderlandit

Të shtunën, Granit Xhaka, debutoi me fanellën e Sunderlandit, në miqësoren që "Macat e zeza" e zhvilluan kundër Betisit. Xhaka, startoi nga minuta e parë duke e mbajtur shiritin e kapitenit, duke dhënë sinjale se ai do të jetë lojtar kyç në skuadër. Edhe pse pësoi humbje, trajneri Regis Le Bris, tha se i kënaqur me paraqitjen e skuadrës, sidomos në pjesën e parë ku, sipas tij, u panë shumë gjëra pozitive. “Na duhet maturi, kualitet, vazhdimësi dhe përvojë, Graniti i ka të gjitha”, deklaroi ai pas ndeshjes, transmeton Klankosova.tv. Le Bris vlerësoi lart edhe paraqitjen e Xhakës, për të cilin tha se ndikon drejtpërdrejt në përmirësimin e lojës së ekipit. “Xhaka e bën më të lehtë për lojtarët përreth tij,” tha ai, duke shtuar se lojtarë të tillë janë të domosdoshëm në Ligën Premier. Dhe kështu qysh nga loja e parë e kapitenit të Zvicrës, u konfirmua roli i tij si shtyllë e mesfushës dhe lider në fushën e blertë. Ndër të tjera, trajneri i dha vulë rreth asaj se mesfushori shqiptar do të jetë kapiten i skuadrës. "Xhaka me gjasë do të jetë kapiten, po.”