“Tifozat Kuq e Zi” kanë reaguar pas dënimit që FIFA ia dha Federatës Shqiptare të Futbollit, që për ndeshjen e radhës, asaj ndaj Serbisë, ta mbyll të paktën 20 për qind e stadiumit.
Sipas TKZ-së, kjo paraqet paaftësinë kronike dhe arrogancën e FShF-së, ku në vend që të garantojë atmosferë sportive dhe të mbrojë tifozët besnikë në prag të ndeshjeve vendimtare të kombëtares, Federata zgjedh t’i përjashtojë ata.
“Më keq akoma, vë në lëvizje gjithë aparatin shtetëror kundër tifozëve shqiptarë, sikur të ishin kriminelë ordinerë. Vendimi i FIFA-s për të dënuar FSHF-në është vetëm pasqyra e një sëmundjeje më të thellë – inkompetencës strukturore dhe mungesës së vizionit. Një institucion që nuk arrin të organizojë siç duhet një ndeshje futbolli, ka kurajon të ëndërrojë organizimin e një Kampionati Evropian”.
“Manipulimi i vazhdueshëm me ndjenjat e tifozëve – herë me zhvendosje të ndeshjeve në Elbasan, herë me kërcënime për mbyllje sektorësh – ka pasur një qëllim të vetëm: t’i largojë ata që e ndjekin Kombëtaren kudo. Këtë herë, goditja është edhe më e ulët: penalizohen pikërisht ata tifozë të organizuar që janë treguar shembull sjelljeje dhe përkushtimi në stadiume”, thuhet në reagimin e TKZ-së, transmeton Klankosova.tv.
Tutje, “Tifozat Kuq e Zi” thanë se aftësia e vetme e FShF-së është rritja e çmimit të biletave.
“Kjo është ‘strategjia’ e tyre: të zhvasin tifozët e ndershëm për të mbuluar paaftësinë e vet. Në vend që të marrin përgjegjësinë, ata zgjedhin rrugën më të lehtë: të “vrasin” futbollin shqiptar, duke ndëshkuar ata që e mbajnë gjallë pasionin për Kombëtaren”, thuhet në reagim.
TKZ-ja tha se është koha që zëri i tifozëve të dëgjohet dhe koha që përgjegjësit, sipas tyre, të japin llogari.
●●●
BSHKRIMI NGA
BM
Editorial nga Klan Kosova — ndjek sport dhe zhvillimet e tjera kryesore të vendit.
