Lajmet e fundit
Shumë qytetarë të Napolit dhe zonave përreth kanë kaluar natën jashtë, në rrugë dhe në veturat e tyre, pas një tërmeti të fuqishëm që shkaktoi dridhjen e ndërtesave dhe frikë të madhe te banorët.
Tërmeti me magnitudë 4.4 goditi qytetin italian të Napoli dhe zonat përreth në orën 01:25 me kohën lokale të enjten. Sizmologët italianë njoftuan se lëkundja kishte një thellësi prej tre kilometrash, ndërsa Shërbimi Gjeologjik i SHBA-së raportoi se tërmeti kishte ndodhur në një thellësi prej 10 kilometrash.
Pasgoditjet e mëvonshme, të cilat ishin më të dobëta, kanë shtuar shqetësimin ndër qytetarët dhe kanë shkaktuar ndërprerje të energjisë elektrike në disa pjesë të qytetit të Napolit.
Napoli ndodhet në Fushat Phlegraean, një pellg vullkanik i njohur për aktivitetin e tij sizmik, që e bën këtë zonë në jug të Italisë më të prirur ndaj dridhjeve të tokës. Shumë zona të rajonit të Campania, përfshirë edhe Napoli, kanë ndjerë pasgoditje të mëtejshme, sipas raporteve të mediave italiane.
Tërmeti ka shkaktuar panik dhe ka nxitur shumë banorë të largohen nga shtëpitë e tyre, duke u mbledhur në rrugët e qytetit në kërkim të sigurisë. Po ashtu, ka pasur raporte për ndërprerje të shërbimeve të urgjencës dhe vështirësi në komunikim në disa zona të rajonit.
Në këtë moment, autoritetet lokale janë angazhuar për të vlerësuar situatën dhe për të ofruar ndihmën e nevojshme për ata që kanë pësuar dëme nga tërmeti.
