Teatri i Tetovës merr në punësim të përhershëm nëntë aktorë të rinj

Teatri i Tetovës ka shënuar një hap të rëndësishëm drejt pasurimit të trupës së tij artistike. Drejtori i institucionit, Hasim Memishi Sopi, ka bërë publik vendimin për pranimin e nëntë aktorëve të rinj në punësim të përhershëm. Deri më tani, këta aktorë kanë qenë të angazhuar me kontrata të përkohshme. “Aktorët e rinj janë një aset i çmuar për teatrin tonë. Vendimet për punësim të përhershëm pasqyrojnë angazhimin tonë për të promovuar talentin e ri dhe për të siguruar që skena jonë të mbetet një pikë referimi për artin,” deklaroi drejtori në një konferencë për mediat, transmeton Klankosova.tv. Sipas një komunikate për media, thuhet se këta aktorë pritet të kontribuojnë në projekte të rëndësishme që Teatri i Tetovës ka planifikuar për sezonet e ardhshme, duke përfshirë premiera të reja dhe produksione të veçanta.