Tahiri: Pres që të jem në 30-shen më të mirë në sllallom të madh

Kosova sot ka debutuar në Olimpiadën Dimërore që po mbahet në Pekin të Kinës me skitarin Albin Tahiri dhe skitaren Kiana Kryeziu. Tahiri e zuri vendin e 35-të prej 43 garuesve pjesëmarrës. Ai në një intervistë të realizuar nga Komiteti Olimpik i Kosovës tha se ishte i lumtur për pozitën e 35-të, por jo edhe aq edhe për mënyrën e lëshimit. Skitari tha se të enjten e pret sfida e ardhme olimpike. “Po, sot ishte gara ime e parë. Shtegu ishte shumë i akullt dhe më i shpejtë seç prisja unë, prandaj edhe i bëra disa gabime të cilat nuk llogarisja se do t’i bëja. Sidoqoftë, vendi i 35-të është më i miri në lojërat olimpike deri tani, prandaj jam i kënaqur me rezultatin por jo edhe me lëshimin. Pres më shumë në kombinimin alpin të enjten dhe shpresoj se do të përfundoj në top 30-she këtë herë”. Kurse, Kiana Kryeziu në njërën garë e zuri vendin e 59-të dhe në garën tjetër përfundoi e 49-ta, në një konkurrencë prej 82 garueseve.