Superkupa në hendboll i takon Rahovecit

Superndeshje është zhvilluar mes Rahovecit e Kastriotit për Superkupën e Kosovës në hendboll. Pas një drame të vërtetë, garën e fitoi Rahoveci me rezultat 31:30. “Vreshtarët” për herë të dytë rresht e fitojnë Superkupën e Kosovës. Ndeshja u zhvillua të shtunën mbrëma në palestrën “Bill Clinton” në Ferizaj, në një atmosferë të zjarrtë në praninë e afro 2500 shikuesve. Ndeshja ishte e fortë, me shumë duele të forta. Dhe u vendos vetëm në aksionet e fundit. Arbios Mushkolaj ishte më efikasi te Rahoveci me shtatë gola. Ardit Tafilaj i shënoi pesë gola, ndërsa nga katër i shtuan Mali Luzha e Hamdi Salihu. Me disa pritje në momente vendimtare u dallua edhe Arbër Curri. Te Kastrioti më efikasi ishte Festim Mustafa me tetë gola. Gjashtë i kishte Adonit Isufi e pesë Beni Sula. Me pritje u dalluan Dardan Dugolli e Wadi Chebbi. Trofeun e Superkupës kapitenit të Rahovecit, Egzon Gjukës ia dorëzoi presidenti i FHK-së, Edin Kolgeci. /Klankosova.tv