Sulmet ruse në Ukrainë lënë të paktën 7 të vrarë dhe dhjetëra të plagosur

Rusia ka kryer sulme me raketa dhe dronë ndaj Ukrainës të shtunën, duke vrarë të paktën shtatë persona dhe duke plagosur dhjetëra të tjerë, njoftuan zyrtarët ukrainas. Presidenti Volodymyr Zelensky bëri thirrje për përpjekje diplomatike për të siguruar që Kievi të marrë më shpejt armët e nevojshme. Ukraina po përballet me mungesë të municioneve për mbrojtjen ajrore, gjë që e ka lënë më të ekspozuar ndaj sulmeve ruse, shkruan Reuters, transmeton Klankosova.tv. Në qytetin verior Sumy, dy bomba ajrore goditën një zonë të populluar, duke shkaktuar vdekjen e pesë personave dhe plagosjen e 30 të tjerëve. Njëra prej bombave goditi një stacion autobusi, ndërsa pamjet nga vendi i ngjarjes treguan një autobus të verdhë me dëmtime të mëdha. Sulmi shkaktoi dëme edhe në fasadat e disa ndërtesave të banimit. Në qytetin juglindor Zaporizhzhia, sulmet me bomba ajrore plagosën 10 persona, sipas guvernatorit të rajonit. Ndërkohë, më herët gjatë ditës, një sulm me raketë në qytetin port të Odesës, në jug të Ukrainës, la të vrarë dy persona dhe plagosi një tjetër.