Studim: Vaksinat e marra pasdite japin më shumë antitrupa sesa ato që merren në mëngjes

Punonjësit e kujdesit shëndetësor që morën vaksinën SARS-CoV-2 pasdite u zbulua se kishin nivele më të larta të antitrupave sesa ata që ishin vaksinuar në mëngjes, sipas një studimi vëzhgues në Journal of Biological Rhythms. Autorët i kanë përshkruar gjetjet e tyre si provë të konceptit se përgjigjja ndaj vaksinës mund të ndikohet nga ritmet cirkadiane të trupit. Simptomat e disa sëmundjeve dhe veprimi i medikamenteve të shumta ndryshojnë sipas kohës. Në një njoftim për mediat mbi hulumtimin, Spitali i Përgjithshëm i Massachusetts përmendi shembullin e njerëzve me sëmundje të mushkërive, të cilët shpesh kanë ashpërsi më të madhe të simptomave dhe funksion të ndryshuar të frymëmarrjes në periudha të caktuara të ditës. Studimi vëzhgues vlerësoi nivelet e antitrupave pas vaksinimit kundër SARS-CoV-2 midis 2 mijë e 190 punonjësve të kujdesit shëndetësor në Mbretërinë e Bashkuar. Mostrat e gjakut u mblodhën nga punëtorët asimptomatikë në kohën e vaksinimit, përcjell Klankosova.tv Studiuesit krijuan një model për të hetuar efektin në nivelet e antitrupave, bazuar në kohën e ditës së vaksinimit, llojin e vaksinës (vaksina Pfizer mRNA ose vaksina adenovirale AstraZeneca), moshën, gjininë dhe numrin e ditëve pas vaksinimit. Studiuesit zbuluan se përgjigjet e antitrupave ishin më të larta në përgjithësi për të gjithë ata që ishin vaksinuar më vonë gjatë ditës. Përgjigjet e antitrupave ishin gjithashtu më të larta tek ata që morën vaksinën Pfizer mRNA, te gratë dhe te të rinjtë, përveç efektit të kohës së vaksinimit.