Sterling rikthehet me dominim total - Shkatërron serinë e Zalal dhe befason të gjithë me thirrjen e madhe: “Dua kampionin”!

Ish-kampioni i peshave bantam (<61 kg), Aljamain Sterling, i kujtoi divizionit featherweight (<66 kg) se mundja e tij mbetet një enigmë që pak kush mund ta zgjidhë. Në luftën kryesore të mbrëmjes së kaluar në ‘Meta APEX’, Sterling dhuroi një performancë mbytëse duke ndalur hovin e Youssef Zalal dhe duke siguruar një fitore bindëse me vendim unanim të gjyqtarëve (49-45), transmeton Klankosova.tv. ​Historia e luftës ishte presioni i pandalur i "The Funkmaster", i cili pas një raundi të parë kompetitiv, ai ndryshoi marshin duke kontrolluar gati 14 minuta të përballjes me marokenin Zalal në tapet. Zalal, i cili hyri në kafaz me një seri prej tetë fitoresh radhazi (5 në UFC, pas rikthimit të tij), u gjend vazhdimisht në pozicion defensiv ndaj tentativave për "submission" dhe goditjeve në tokë. Ndonëse Zalal tregoi zemër të madhe për t'i mbijetuar pesë raundeve, ai nuk pati asnjë përgjigje për mundjen taktike të Sterling. Pas fitores, Aljo i ktheu menjëherë sytë nga titulli, duke sfiduar kampionin aktual të divizionit, Alexander Volkanovski. ​Pjesa tjetër e “main card”, ofroi një përzierje luftërash të forta dhe përfundimeve të papritura. Joselyne Edwards siguroi fitoren më të rëndësishme të karrierës së saj duke mposhtur Norma Dumont në bashkë-ndeshjen kryesore, ndërsa Ryan Spann dhuroi momentin më spektakolar të mbrëmjes, me një KO brutal në raundin e dytë kundër Marcus "Buchecha" Almeida. Ndërkohë, Davey Grant dhe Adrián Luna Martinetti dhuruan një betejë me ritëm të lartë që u shpall "Lufta e Mbrëmjes". ​Me këtë performancë, Sterling konfirmohet si një kërcënim legjitim në peshat deri 66 kg, duke e bërë garën për titull në këtë divizion shumë më të komplikuar dhe të rrezikshëm.