Steriliteti i meshkujve lidhet me rritjen e rrezikut të kancerit në familje

Një mangësi ose mungesa e spermës së qëndrueshme në spermën e një mashkulli mund të paraqesë rrezik për të dhe ata që janë të lidhur ngushtë me të, sugjeron një studim i ri. Kanceret kanë më shumë gjasa të ndodhin te këta burra dhe familjet e tyre, raporton një ekip i udhëhequr nga Joemy Ramsay, asistente profesoreshë në Universitetin e Jutas në Salt Lake City. Lidhja e saktë midis rrezikut të kancerit dhe infertilitetit mashkullor nuk është ende e qartë, por "duke identifikuar familjet me modele të ngjashme të kancerit, ne mund të jemi në gjendje të zbulojmë faktorë që përfshihen si në infertilitet, ashtu edhe në kancer", tha Ramsay. Gjetjet u publikuan të mërkurën në revistën Human Reproduction. Siç theksoi ekipi, studimet e mëparshme kanë vërejtur lidhje midis reduktimit të spermës tek meshkujt dhe rrezikut të kancerit familjar. Por madhësia e efektit nuk ishte studiuar. Në këtë hulumtim të fundit, grupi i Ramsayt mblodhi rezultatet e analizave të mostrave të spermës nga rreth 800 burra në Utah të ShBA-së që po vizitonin klinikat e fertilitetit dhe i krahasoi ato gjetje me mostrat nga pothuajse 5 mijë e 700 burra të njohur si pjellorë (kishin të paktën një fëmijë). Nga meshkujt infertilë, 426 nuk kishin spermatozoide në spermën e tyre, ndërsa 360 të tjerë kanë vetëm nivele shumë të vogla të spermës. Ramsay dhe kolegët e saj më pas morën statistika për çdo histori të kancerit në grupin e plotë të burrave dhe familjeve të tyre. Midis burrave pa spermatozoide në spermë, 12 nga 13 nga familjet përkatëse të burrave kishin shkallë më të lartë për të paktën një lloj kanceri. Rezultatet ishin të ngjashme për burrat që kishin sasi shumë të vogla të spermatozoideve në spermën e tyre: Të 12 familjet e lidhura me këta burra kishin shkallë më të lartë të kancerit, zbuloi studimi. Anëtarët e familjes së meshkujve me këtë problem kishin një rrezik 156 për qind më të lartë të kancerit të kockave dhe kyçeve; një shans 56 për qind më i lartë për sarkomat dhe tumoret e tjera të indeve të buta; një rrezik 27 për qind më i lartë për kancerin e mitrës; 60 për qind shanse më të larta për limfomën Hodgkin dhe 54 për qind shanse më të larta për tumoret e tiroides. Anëtarët e familjes së meshkujve me sasi minimale të spermatozoideve u përballën me shanse të ngjashme: një rritje prej 143 për qind në kancerin e kockave dhe kyçeve, një shans 16 për qind më të lartë për kancerin e zorrës së trashë dhe një rrezik 134 për qind më të lartë për kancerin e testikujve, zbuluan studiuesit. Në mesin e këtij grupi kishte një të veçantë: një rrezik 61 për qind më i ulët për kancerin e ezofagut, sipas ekipit të Utahut.