Sot fillon faza e Playoff në basketbollin kosovar

Sigal Prishtina me fitore ndaj Ponte Prizrenit e përmbylli sezonin e rregullt të garave në Prince Caffe Superligën e Kosovës në basketboll. Bardhë e kaltërit së bashku me Pejën që përfundoi e dyta, kaluan direkt në gjysmëfinale të Playoff. Aty do të presin fituesit e çerekfinaleve, që fillojnë këtë mesjavë. Sot me fillim nga ora 20:00 takohen pozita 3, Golden Eagle Ylli me pozitën 6, Vëllaznimin. Në kampionat, therandasit kanë fituar katër ndeshjet e zhvilluara ndaj gjakovarëve. Dominuese por jo 100%, ka qenë Trepça ndaj Bashkimit, pasi mitrovicasit kanë fituar 3 nga 4 ndeshjet ndaj prizrenasve. Këto dy ekipe që përfunduan në pozitat 4 dhe 5, duelin e parë e zhvillojnë të enjten nga ora 20:00. Kush siguron 2 fitore nga kjo fazë, ballafaqohet në gjysmëfinale me Prishtinën, ndërsa triumfuesi i dueleve Golden Eagle Ylli-Vëllaznimi, përballet me Pejën. Të gjitha ndeshjet transmetohen në kanalet e sportit të platformës Artmotion.