Sot dhe nesër jepet premiera e shfaqjes “Djali” e dramaturgut Florian Zeller

Premiera e shfaqjes “Djali” e dramaturgut të njohur francez, Florian Zeller dhe në regji të Erson Zymberit do të vihet në skenë të premten dhe të shtunën, më 22 dhe 23 nëntor 2024, ora 20:00, në sallën kryesore të Teatrit të Gjilanit. Kjo vepër teatrore, cilësohet si e tillë që ka lënë gjurmë në skenat ndërkombëtare për ndjeshmërinë dhe fuqinë e saj emocionale. "Djali" është historia e një familjeje në krizë. Është një thirrje që shkon përtej zërit të zakonshëm të skenës, e cila kërkon të zbulojë ato dhimbje të thella që fshihen pas formave apo fasadave të heshtura të familjeve moderne. Kur Nikolas, një djalë adoleshent, fillon të tregohet i tërhequr dhe i shqetësuar, prindërit e tij të divorcuar përpiqen ta ndihmojnë atë, por përballen me sfidat e brendshme të familjes së re dhe dinamikat komplekse të marrëdhënieve të tyre. Shfaqja eksploron dhimbjen, humbjen dhe përpjekjet për të kuptuar dhe për të mbështetur ata që vuajnë në heshtje. Me një ndërtim emocional të fuqishëm, shfaqja trajton çështjet e rëndësishme të shëndetit mendor, ndërsa thekson rolin dhe përgjegjësinë e prindërve. Shfaqja përmes një rrëfimi të ndjeshëm dhe të sinqertë, eksploron pyetje që lidhen me përgjegjësinë, dashurinë dhe kompleksitetin e marrëdhënieve njerëzore”, njofton regjisori Erson Zymberi. Në shfaqje luajnë aktorët Kushtrim Qerimi, Yzeir Meha, Safete Mustafa Baftiu, Tringa Hasani dhe Florent Salihu.