Skitari Kokaj në Lojërat Olimpike Dimërore: Momenti më kulminant në karrierën time

Ëndrrën më të madhe të jetës e realizoi. Skitari Drin Kokaj do ta përfaqësojë Kosovën në Lojërat Dimërore Milano Cortina 2026 në Itali, që mbahen nga data 6 e deri më 22 shkurt, bashkë edhe me kolegen e tij, Kiana Kryeziu. Kokaj, në një intervistë për Klankosova.tv, tha se synimi i tij është që të ketë një përfaqësim sa më dinjitoz. "Synimi im është përfaqësimi sa më dinjitoz i shtetit dhe një performancë personale me teknikë sa më të mirë", deklaroi ai. Skitari kosovar foli edhe për emocionet kur e kishte kuptuar se do ta ketë mbi supe prezantimin e shtetit tonë. "Ky lajm është ëndrra e çdo sportisti, pavarësisht sportit. Kur e kam kuptuar, ka qenë momenti kulminant i ëndrrës sime. Është shumë e vështirë me e shpjegu me fjalë atë ndjenjë, fluturat në bark ende nuk janë qetësuar", theksoi Kokaj për Klankosova.tv. Por, natyrisht që në këtë rrugëtim, është ballafaquar edhe me pengesa. "Pengesën kryesore do ta quaja mungesën e fondeve, të cilat na kanë limituar në ndjekjen e kampeve përgatitore, ashtu siç i ka mundësitë një sportist i këtij kalibri në shtete më të zhvilluara. Megjithatë, me aq sa kemi pasur mundësi, jemi munduar gjithmonë të japim maksimumin dhe të nxjerrim më të mirën", tha Kokaj për Klankosova.tv. Gjatë intervistës, Drini nuk e la pa folur për dashurinë dhe fillimet e tij në këtë sport. "Dashnia për skijimin ka lind që prej fëmijërisë. Me familjen kemi shku shpesh, meqë babai është marrë me skijim, e gradualisht edhe ne jemi interesu me u angazhu në gara. Fillimisht kanë qenë motrat, e më pas edhe unë personalisht. Me kalimin e kohës jam lidhur shumë fort, edhe emocionalisht, me skijimin, me bukurinë e natyrës dhe adrenalinën që ky sport ta ofron", tha ai. Gjithashtu, skitari zbuloi se kush ishte motivi kryesor për t'u marrë me skijim. "Me këtë sport jam marrë profesionalisht që i vogël. Kam qenë fëmijë shumë aktiv dhe njëkohësisht synimi i prindërve ka qenë gjithmonë që të na edukojnë përmes sportit, në mënyrë që të mos kemi hapësirë për vese të këqija. Motivi im kryesor ka qenë familja, e cila asnjëherë nuk është lodhur duke më shty përpara dhe duke më mbështetur", theksoi Kokaj. Ndër tjera, Drin Kokaj, zbuloi që ka pasur edhe të tillë që janë munduar tërthorazi ta bindin të mos merrej me këtë sport. "Po, gjatë rrugëtimit ka pasur plot pengesa të tilla. Sidomos në moshën e adoleshencës, kur të duket që po e lë anash shoqërinë dhe qejfet e moshës. Shpesh shoqëria fillon mos me të përfshi në planet e tyre, sepse ti thuajse nuk je kurrë i lirë dhe rrallë në vendlindje. Pastaj janë edhe procedurat burokratike që dinë me qenë shumë të lodhshme. Por fati im i mirë ka qenë që shoqnia e vërtetë nuk më ka lënë kurrë anash, përkundrazi më ka përkrahur gjithmonë, ndërsa familja ka qenë pranë meje në çdo moment", deklaroi skitari Drin Kokaj. Lojërat Olimpike Dimërore 2026, zyrtarisht Lojërat e XXV-ta Olimpike Dimërore dhe të njohura zakonisht si Milano Cortina 2026, janë një ngjarje ndërkombëtare shumësportive e planifikuar të zhvillohet nga 6 deri më 22 shkurt 2026 në vende në të gjithë Lombardinë dhe Italinë Verilindore. /Klankosova.tv